en fy eu mk sl ga

Elvira Bonafacio

2018-11-21 16:50 — Belfast, Ireland

Ekpreshon literario artístiko 2

Arte den skol

Enseñansa ta desaroyando mundialmente i mas i mas tin atenshon pa e parti di ekpreshon literario den skol, kual a reflehá den e festival di sine di Queen Univerisity,  QFT Film Festival. Pero no ta aki so arte a haña su lugá den skol, e tayernan di literatura ku mi tabatin den skol a resultá di ta e e klimaks di mi proyekto pa Other Words.

Festival di sine QFT: A Northern Soul

E pelíkula aki ta inspirativo den tur sentido. Pa kuminsá pa hasi e grabashonnan nan a hasi uso di kualke kámara ku ta graba, ku nan tatatin na nan alkanse, i a sa di rafiná kaminda ta nesesario durante e parti di edishon. Esaki ta un motivashon pa kualke persona ku ke dokumentá algu i ta na mes momentu ta un rekordatorio, ku pa hasi grabashon no nesesariamente bo mester tin e ekipo di mas moderno.

Tambe e ta un pelíkula akí ku por sirbi komo reflekshon pa kualke persona ku tin pensá pa kuminsá ku nan mes kompania basá riba nan pashon. E protagonista Steve,a usa su pashon pa e músika di hip-hòp i rèp komo un medio pa laga mucha di skol básiko ekspresá, haña konfiansa den nan mes i siña aseptá diferensia. Un soño ku el a traha pa hasi realidat. E fábrika, ARCO, ku e tabata traha p’e a yud’é ku patrosinio di e bùs ku e tabatin mester pa e bai pa su soño, i nan a kooperá dunando e un sierto fleksibilidat di ora di trabou. Pero despues ku esaki no tabata sufisiente Steve a skohe pa kita for di trabou i dediká kompletamente na realisashon di su soño. Un soño ku sierto momentu a bira manera un mal soño debí na e peso finansiero. Pero danki na sosten di hendenan ku el a haña pa gui’é, e por a sali eksitoso for di esaki.

Steve su bùs ku yama Beats Bus a sa di duna e resultado deseá. Steve tabata pasa na diferente skol, prinsipalmente di e skolnan den e barionan ménos pudiente, i aki tene diferente tayer kaminda e muchanan no únikamente ta rèp i graba un cd, pero ta eksperensiá tur loke tin di aber ku e mundu ei, for di kreamentu di e músika te na koreografia. Bunita tabata pa mira kon mucha sumamente tímido òf ku tabata sinti nan di tèr, tabata integrá den e proyekto, i te asta bira masha mòndu. Probando asina ku arte ta un forma di ekspreshon esensial i ku ta aportá positivamente na desaroyo di mucha i hóben.

Tayer di literatura den skol

Komo parti di mi proyekto mi a skohe pa skirbimentu kreativo den skol, den e kaso akí ku atenshon riba e género di poesia. Den kada tayer, ami huntu ku un eskritor (ku tabata varia pa tayer) tabatin e oportunidat pa durante di un ora i mei, kompartí, duna informashon tokante mi idioma papiamentu, laga nan reflekshoná riba nan identidat, i e importansia di nan idioma; maske esaki por ta un idioma den minoria. Tambe nos a para ketu na e importansia di diversidat durante di e tayernan aki.

E eksperensia tabata algu ku palabra ta kai chikí pa por splika. Tabata inkreibel di mira kon aktivo i partisipativo e hóbennan akí tabata, inkluso kon mucha hòmber tabata esnan mas prominente den e parti di skirbi i kompartí. Un hende no por imaginá nan mes kuantu kos positivo skirbimentu kreativo den lès di idioma por aportá na mucha i hóben su desaroyo. Un frase manera: “It was fun!”. Ta algu ku masha dia dosente no a tende den skol, i pero tabata e frase ku mas a resaltá durante di e tayernan. Tabata un delisia mira kon e muchanan ta realisá ku skibimentu kreativo por ta un terapia, tambe pa skucha ku e aktividat akí a sirbi komo inspirashon pa e dosente. Aserka di mira kon kreativo mucha por ta na momentu ku nan haña e espasio pa hasi esaki, i e balor agregá di tipo di aktividatnan manera esaki kaminda ta e mucha ta reflekshoná riba aspekto di bida di un forma agradabel.