Hende tin e tendensia di mustra mundu únikamente loke ta bon. Imperfekshon, kos malu òf ménos bon tin e tendensia di keda skondí. Motibu pa esaki por ta diferente i ta varia pa kultura. Pero echo ta ku tur perfekshon tin su imperfektshon. Esaki ta e balansa di bida...maske tin biaha e por kousa shòk.

Balansa

Atenshon, Atenshon, NASA Atenshon!

Den hemisferio un fenómeno straño a presentá

Den órbita tur e planetanan ta paralisá

Den nos sistema solar nada n’ ta sinkronisá

Siklo entre solo i luna ta tur rebultá

Strea di nòrt di repente tambe a somentá

Sero reakshon!

Ta parse ku no tin registrashon

di e situashon universal ku ta halando atenshon.

E no a krea niun impreshon, òf lanta posibel emoshon,

serka esnan responsabel pa un mediashon.

Kon por ta!

Planeta tera ta keintando!

Meteo sí ta registrá loke ta desaroyando

Un depreshon tropikal ta afektando

Bientu ku ráfaga fuerte ta asotando

Un volkan den erupshon ta menasando

Atenshon Atenshon Atenshon, bida ta deteriorando!

Fayo, Fayo, Fayo!

Nos no ta detektá e idioma.

Nos no ta rekonosé e kódigo.

Fayo di sistema.

Por fabor, aktualisá i kuminsá di nobo pa un funshonamentu korekto.

Un gritu den universo

Silensiá pa un makinaria intelektual

Diseñá pa funshoná individual.

Sakrifisio di e loke ta esensial

Ta bira algu masha usual

Pa sigui e patronchi pre determiná

i entregá e resultado deseá.

Lagando e individuo indiferente

i te asta bira inkoherente

Sin importá ku e proseso por bira defisiente,

Basta e produkshon ta ekselente.

 Un proseso balansá ta loke ku alma i universo ta anhelá,

Pero ketu bai e individuo ta siegá riba e “meta” ku e tin ku alkansá.

Elvira Bonafacio, Belfast 7 di òktober 2018